Tilstandsrapport for 2025 opplæring innan kriminalomsorga
Statsforvaltaren i Vestland har publisert tilstandsrapporten for opplæring i kriminalomsorga for 2025. Rapporten viser ein nedgang i talet på deltakarar, samtidig som opplæringa i fengsla er inne i ei tid med store endringar.
Færre deltek – men opplæringa er i endring
Tala viser ei nedgang i talet på deltakarar samanlikna med 2024. Nedgangen er størst i vidaregåande opplæring og i korte opplæringstilbod. Samstundes aukar talet på deltakarar i grunnskuleopplæring og fagskule, og fleire elevar får standpunktkarakterar. Det er derfor for tidleg å konkludere med om nedgangen representerer redusert opplæringsaktivitet, eller om han speglar ei utvikling mot meir heilskaplege og formalgivande opplæringsløp.
Innføringa av modulstrukturert fag- og yrkesopplæring er ein viktig del av denne utviklinga. Rapporten viser samtidig at dei fysiske rammene for yrkesfagleg opplæring fleire stader er mindre eigna enn for teoriopplæring. Dette er ei særleg utfordring fordi yrkesfag er det mest etterspurde opplæringstilbodet blant innsette.
Rapporten viser også framgang i arbeidet med oppfølging etter lauslating. Nesten alle fylkeskommunane har no minst éin oppfølgingsbase etablert eller under etablering.
Les Tilstandsrapport for opplæring i kriminalomsorga 2025 for meir om utviklinga, utfordringane og det fullstendige talgrunnlaget.